મઘાનીસર ખાતે નિઃશુલ્ક હોમિયોપેથીક નિદાન અને સારવાર કેમ્પ યોજાયો
પૂર્વ ભાજપ પ્રમુખ શ્રી મુકેશભાઈ સામસુભાઈ ડામોરની ઉપસ્થિતિમાં યોજાયેલા કેમ્પમાં મોટી સંખ્યામાં ગ્રામજનોએ લીધો લાભ
મઘાનીસર, તા. ૩૦ સપ્ટેમ્બર, ૨૦૨૬:
મઘાનીસર ગામ ખાતે રામકૃષ્ણ મિશન વિવેકાનંદ મેમોરિયલ, વડોદરા દ્વારા નિઃશુલ્ક હોમિયોપેથીક નિદાન અને સારવાર કેમ્પનું આયોજન કરવામાં આવ્યું હતું. આ કેમ્પમાં પૂર્વ ભાજપ પ્રમુખ શ્રી મુકેશભાઈ સામસુભાઈ ડામોર ઉપસ્થિત રહ્યા હતા અને ગ્રામજનોને મળતી આરોગ્ય સેવાઓની કામગીરીની મુલાકાત લીધી હતી.
કેમ્પ દરમિયાન વિવિધ પ્રકારની આરોગ્ય સમસ્યાઓ માટે નિષ્ણાત તબીબો દ્વારા નિઃશુલ્ક તપાસ અને સારવાર કરવામાં આવી હતી. જેમાં હરસ, મસા, ભગંદર, પથરી, શ્વાસ લેવામાં તકલીફ, વિવિધ પ્રકારની એલર્જી તેમજ ચામડીના રોગો જેવા કે ધાધર, ખસ, ખરજવું અને શીળસ સહિતની તકલીફોની તપાસ કરવામાં આવી હતી. આ ઉપરાંત મહિલાઓને લગતા વિવિધ રોગોની પણ નિઃશુલ્ક તપાસ અને સારવાર કરવામાં આવી હતી.
ગ્રામ્ય વિસ્તારમાં લોકોને તેમના નજીકના સ્થળે નિઃશુલ્ક આરોગ્ય સેવા મળી રહે તે હેતુથી યોજાયેલા આ કેમ્પને ગ્રામજનો તરફથી સારો પ્રતિસાદ મળ્યો હતો. મોટી સંખ્યામાં લોકોએ કેમ્પમાં હાજરી આપી પોતાની આરોગ્ય તપાસ કરાવી હતી અને નિઃશુલ્ક હોમિયોપેથીક સારવારનો લાભ લીધો હતો.
આ પ્રસંગે ઉપસ્થિત આગેવાનો અને આયોજકોએ જણાવ્યું હતું કે આવા આરોગ્ય કેમ્પના આયોજનથી ગ્રામ્ય વિસ્તારના લોકોને આરોગ્ય સેવાઓ સરળતાથી ઉપલબ્ધ બને છે અને સમયસર નિદાન તથા સારવાર મેળવવામાં મદદરૂપ થાય છે.