નેશનલ ગ્રેપલિંગ ચેમ્પિયનશિપમાં દેવગઢ બારીયાના અર્પિત રાણાએ બે મેડલ જીત્યા

દેવગઢ બારિયા: હરિદ્વાર ખાતે યોજાયેલી નેશનલ ગ્રેપલિંગ ચેમ્પિયનશિપ-2026માં દેવગઢ બારિયા શહેરના યુવા ખેલાડી અર્પિત ચંદ્રકાંત રાણાએ શાનદાર પ્રદર્શન કરી બે મેડલ મેળવી શહેરનું તથા શાળાનું નામ રોશન કર્યું છે. અર્પિત રાણા એસ.આર. હાઈસ્કૂલ (ડી.એલ.એસ.એસ.)માં ધોરણ-10માં અભ્યાસ કરે છે. અંડર-15 કેટેગરીમાં 90 કિલો ગી કેટેગરીમાં અર્પિતે ગુજરાતમાં પ્રથમ સ્થાન મેળવી ગોલ્ડ મેડલ પ્રાપ્ત કર્યો હતો. જ્યારે 90 કિલો નો-ગી કેટેગરીમાં શાનદાર પ્રદર્શન કરી બ્રોન્ઝ મેડલ મેળવ્યો હતો.

સામાન્ય પરિવારના અર્પિતે પોતાની મહેનત, લગન અને રમત પ્રત્યેના સમર્પણથી રાષ્ટ્રીય કક્ષાની સ્પર્ધામાં સફળતા મેળવી છે. તેની આ સિદ્ધિથી પરિવારજનો તેમજ એસ.આર. હાઈસ્કૂલના શિક્ષકો અને વિદ્યાર્થીઓમાં આનંદની લાગણી જોવા મળી રહી છે. અર્પિત રાણાની આ સિદ્ધિ બદલ બારીયા શહેરના રમતપ્રેમીઓ તથા શાળા પરિવાર દ્વારા તેને અભિનંદન પાઠવી ભવિષ્યમાં વધુ સફળતા મેળવે તેવી શુભેચ્છાઓ પાઠવવામાં આવી હતી.